په کندهار کې یو ایرانی د جاسوسۍ په تور ونیول شو
تاند- په کندهار کې چارواکي وايي، یو ایرانی یې د جاسوسۍ په تور نیولی دی.
د کندهار د امنیه قوماندانۍ ویندوی ضیا دراني نن /سې شنبه/ وویل، دا ایرانی د کندهار ښار په شپږمه امنیتي حوزه کې نیول شوی دی.
د دراني په وینا دغه کس د ایران په زاهدان ښار کې له طالبانو سره بلد شوی؛ له هغوی سره یې له اوږدې مودې راهیسې تماسونه لرلي او وروسته د طالبانو له لوري په قاچاقي ډول د هرات له لارې افغانستان ته راغلی دی.
د کندهار د امنیه قوماندانۍ ویندوی وايي چې نیول شوي ایراني په خپلو اعترافونو کې ویلي چې دنده یې لرله چې د دولتي ادارو عکسونه او نقشې چمتو کړي او د دولت وسله والو مخالفانو ته یې د حملو لپاره ورکړي.
د ښاغلي دراني له څرګندونو داسي ښکاري چې نیول شوی کس په مستقیم ډول د ایران د حکومت له لوري افغانستان ته نه وي راستول شوی.
وسله وال طالبان د زاهدان په شمول د ایران په سرحدي ښارونو کې مرکزونه، دفترونه او کورونه لري.
ضیا دراني، د نیول شوي کس نوم یاد نه کړ خو ویې ویل چې دوسیه یې څارنوالۍ ته سپارل شوې ده.
نظرات بسته شده است.