ټرمپ: طالبانو سخته اشتباه وکړه او داسې سخت وهل شوي چې ساری نه لري

دآزادی راډیو

د امریکا د متحدو ایالاتو ولسمشر ډونالد ټرمپ ویلي چې وسله والو طالبانو سخته اشتباه وکړه او داسې سخت وهل شوي چې په ۱۹ کلنې جګړه کې ساری نه لري.

ډونالد ټرمپ ویلي، اوس طالبانو ته هم جوته شوې چې له ده سره په معامله کې تېروتي دي.

ټرمپ دا خبره پرون د سپټمبر په شلمه په سپینه ماڼۍ کې د استرالیا له صدراعظم سره تر کتنې وروسته خبریالانو ته وکړه.

ډونالد ټرمپ وویل چې له وسله والو طالبانو سره یې د امریکا خبرې د دې لپاره لغوه کړې چې هغوی اوربند ونه کړ او د خلکو وژلو ته یې د قدرت د څرګندولو د وسیلې په توګه کتل.
ټرمپ د یوه خبریال د پوښتنې په ځواب کې وویل: دا چې هغوی اوربند ونه کړ، زما خوښه نه شوه، که هغوی اوربند نه شو کولی، نو موږ ولې ځان ته تکلیف ورکاوه؟

د امریکا د متحدو ایالاتو ولسمشر وویل چې وسله وال طالبان په تېرو نولسو کلونو کې داسې نه وو ځپل شوي، لکه اوس په دې څو ورستیو ورځو کې چې ځپل شوي دي.

ډونالد ټرمپ وایي: موږ په افغانستان کې وسله وال طالبان داسې سخت وهلي چې په وروستیو نولس کلونو کې نه وو وهل شوي، هغوی سخت ځپل شوي، له ډېرو معتبرو سرچینو ماته دا خبره هم را ورسېده چې هغوی وايي چې له دې سړي سره موږ تېروتنه وکړه، هغوی اشتباه وکړه.

د امریکا د متحدو ایالاتو ولسمشر د سپټمبر په نهمه نېټه په کابل کې د دوهمو مکروریانو پر سړک تر چاودنې وروسته له وسله والو طالبانو سره خبرې لغوه کړې.

په هغه چاودنه کې د یوه امریکايي عسکر په شمول ۱۲ تنه وژل شوي وو.
ډونالد ټرمپ پرون په سپینه ماڼۍ کې خبریالانو ته وویل، وسله والو طالبانو داسې ګڼله چې د دولسو کسانو وژل د زور او قوت څرګندولو نښه ده.

ټرمپ وویل، کله چې یې په هغه پېښه کې د خلکو د وژل کېدو او زخمي کېدو خبره واروېده، پرېکړه یې وکړه چې له طالبانو سره خبرې په درد نه خوري.

ټرمپ وویل: په هغه ګړۍ مې وویل چې زه نور له هغوی سره معامله نه غواړم.
Donald J. Trump
✔
@realDonaldTrump
Unbeknownst to almost everyone, the major Taliban leaders and, separately, the President of Afghanistan, were going to secretly meet with me at Camp David on Sunday. They were coming to the United States tonight. Unfortunately, in order to build false leverage, they admitted to..

85.8K
8:51 AM – Sep 8, 2019
Twitter Ads info and privacy
55.2K people are talking about this
په قطر کې د د وسله والو طالبانو یوه استازي څو ورځې وړاندې رسنیو ته وویل چې د مذاکرو لپاره یې دروازې خلاصې دي.

وروسته له دې چې د امریکا ولسمشر ټرمپ له طالبانو سره د سولې خبرې لغوه کړې، د افغانستان ولسمشرۍ ماڼۍ د سولې په روانه پروسه کې د رامنځته شوي خنډ لامل د افغانانو پر وړاندې د طالبانو روانه جګړه او تاوتریخوالی وباله.​

د ولسمشرۍ ماڼۍ له لوري په خپره شوې خبر پاڼه کې راغلي وو چې د افغانستان خلک او دولت د باعزتې او تلپاتې سولې غوښتونکي او د سولې په تړاو ټولو هلو ځلو ته ژمن دي.

د ارګ اعلامیه وايي: موږ تل ټينګار کړی چې واقعي سوله هله راتلی شي چې طالبان افغان وژنه بس کړي، اوربند ته غاړه کېږدي او افغان دولت سره مخامخ خبرو ته حاضر شي.
د افغانستان د سولې لپاره د امریکا د حکومت خاص استازی زلمی خلیلزاد په غیر مترقبه ډول د سپټمبر په پنځمه نېټه له کابله قطر ته ولاړ او بیا واشنګټن ته ستون شو.
زلمی خلیلزاد د سپټمبر په نولسمه د امریکا د استازو مجلس د بهرنیو اړیکو کمېټې ته ور احضار شوی و.

خو د افغانستان د سولې د پروسې په اړه د سوالونو او ځوابونو دا مجلس د بندو دروازو شاته و.
ایا امریکا به بیا د مذاکرو مېز ته ستنه شي؟

دا هغه پوښتنه ده چې یوازې وخت به یې ځواب ووايي.