ولسمشر غني له طالبانو وغوښتل چې سوله وکړي او په انتخاباتو کې ونډه واخلي
ولسمشر محمد اشرف غني وايي، افغان ولس سولې ته د رسېدو لپاره خپله اراده او تګلاره لري او خپل برخلیک پخپله ټاکي.
ښاغلي غني د چهارشنبې په ورځ»۱۳۹۷کال چنګاښ۲۷» په ولسمشرۍ ماڼۍ کې د څارنې او انسجام مشترک بورډ غونډې ته وویل چې افغانان به پخپلې کلکې ارادې سره له روان ناورین نه ځان وباسي او د روښانه راتلونکي په لور به ګام اخلي.
د نوموړي په خبره، د سولې ټینګښت او راتلونکې ولسمشریزې ټاکنې د طالبانو په ګډون ټولو افغانانو ته يو ښه فرصت دی چې د قانون په رڼا کې ترې ګټه واخلي.
ښاغلي غني زیاته کړه د دې پرځای چې له انتخاباتو وروسته سوله وکړو ښه ده چې دغه کار له انتخاباتو وړاندې وشي.
نوموړي زیاته کړه:
“پخوا افغانانو له نورو غوښتل چې دوی ته سوله راوړي، خو موږ نن د سولې لپاره خپله تګلاره، خپله اراده، خپل پلان او خپل ملي ابتکار لرو، موږ د خپل راتلونکي مالکیت پخپل لاس کې اخېستی دی او دا د دې لپاره چې غواړو اساسي قانون چې د لوبې بنسټيزه قاعده ده پلې کړو.”
ولسمشر محمد اشرف غني وايي، سولې ته د رسېدو لپاره د ډاډ فضا او د زغم او منلو فرهنګ ته اړتیا ده او دغه بهیر باید په هر اړخیز او اساسي توګه پرمخ لاړ شي.
ښاغلي غني په بېلا بېلو برخو کې شویو پرمختګونو ته په اشارې وویل چې نوی افغانستان له ستونزو سره سره د بدلون او سمون په لور روان دی.
نوموړي وویل چې مسؤلیتونه او چارې باید له افرادو نه بنسټونو ته انتقال شي څو متوازن انکشاف او د اعتماد فضا ته زمینه مساعده شي.
په ورته وخت کې په افغانستان کې د ملګرو ملتونو ځانګړي استازي تدامچې ياماماتو چې په دغه غونده کې یې ګډون درلود وویل چې له ستونزو سره سره په افغانستان د سولې ټینګښت،رڼو ټاکنو ترسره کېدو او اقتصادي پرمختګ ته ښې زمینې مساعدې دي.
نوموړي زیاته کړه:
“نننۍ ناسته ډېره مهمه ده او موږ دا باید ووایو چې موږ په افغانستان کې سیاسي پرمختګونه وینو، طالبانو پرته له کوم قیدو شرطه د سولې وړاندیز او د اختر په ورځو کې اوربند دا وښودله چې په افغانستان کې سوله ټینګېدلای شي.”
خو ښاغلي تدامیچي په افغانسان کې د ناامنیو او فقر زیاتېدل لویې ننګونې وبللې او په دې برخه کې یې د لازمو اقداماتو خبره وکړه.
دا د نظارت او څارنې د ګډ بورډ ۲۱ ناسته وه چې د افغان حکومت او بېلا بېلو هېوادونو او نړیوالو سازمانونو د استازو په ګډون په کابل کې وشوه.
په دغه ناسته کې افغان چارواکو او نړیوالو شریکانو یې د ژنیو راتلونکې غونډې په تیاریو چې ټاکل شوې د روان کال په نومبر میاشت کې ترسره شي خبرې وکړې.
افغان ولسمشر محمد اشرف غني ټینګار کړی چې د ژنیو په ناسته کې به د افغانستان د سولې د بهیر په اړه لا ډېر معلومات نړیوالو ته وړاندې کړي.
راپور: محمد واصل وصال
نظرات بسته شده است.