مکین: تر څو چې د افغانستان د ستراتیژۍ په اړه معلومات رانه کړل شي، د دفاع وزارت کاندیدان نه تاییدوو
تاند- د امریکا د سنا جرګې د پوځي خدماتو د غښتلې کمېټې مشر د سې شنبې په ورځ وویل، تر هغو به د ولسمشر ټرمپ د دفاع وزارت د چوکیو لپاره کاندیدانو ته د اعتماد رایه ورنه کړي چې د افغانستان په اړه د ټرمپ د نوې ستراتیژۍ په باب د ده له کمېټې سره معلومات شریک شوي نه وي.
جان مکین، چې د سنا جرګې ريیس او د امریکا د کانګریس د جمهوریپال ګوند مخکښ سناتور دی، د افغانستان په قضیه کې ځانګړې لېوالتیا لري.
مکین، چې د اریزونیا ایالت سناتور دی، وايي چې د ده کمېټه د دې لپاره چې د ولسمشر ټرمپ دفاع وزارت د پوسټونو کاندیدان تایید کړي د افغانستان په اړه زغردو او ښکاره معلوماتو ته اړتیا لري.
«که معلومات رانه کړای شول، موږ دا کار نه شو کولی.»
ټرمپ د اګست په وروستیو کې د مکین له سختو انتقادونو وروسته د افغانستان لپاره نوې ستراتیژي اعلان کړه چې پر اساس یې په افغانستان کې د امریکايي پوځیانو شمېر زیاتېږي او له دې هیواده د امریکايي پوځیانو د ایستلو مهالوېش، چې د اوباما په دوره کې اعلان شوی و، لغو شو.
خو له دې سره سره د مکین لپاره دا د قناعت وړ نه ده.
مکین په افغانستان کې د امریکايي پوځیانو د پاتې کېدو غوښتونکی دی او وايي، باید امریکا تر هغو له دې هیواده پوځیان ونه باسي چې ټول تروریستان ځپل شوي نه وي.
نظرات بسته شده است.