ملګرو ملتونو او ناټو د سولې د مشورتي لويې جرګې د پرېکړو ملاتړ کړی

دآزادی راډیو

ملګرو ملتونو او ناټو تړون د افغانستان د سولې لپاره د مشورتي لويې جرګې له پرېکړو ملاتړ کړی دی.

په افغانستان کې د ملګرو ملتونو ماموریت یا یوناما د افغان دولت او طالبانو ترمنځ د اوربند په اړه د سولې د مشورتي لویې جرګې د غوښتنې ملاتړ کړی دی.

ملګرو ملتونو په یوې اعلامیه کې ویلي دي چې د مشورتي لويې جرګې له خوا غوښتل شوی اوربند به په افغانستان کې د سولې لپاره د زمینې په برابرولو کې مرسته وکړي او د افغانانو ژوند به وژغوري.

د یوناما په اعلامیه کې راغلي دي چې ملګري ملتونه چمتو دي چې د افغانستان د جګړې د پای ته رسېدو په هدف له ټولو ښکېلو خواو سره لازمه مرسته او همکاري وکړي.

یوناما په بریالیتوب سره د مشورتي لويې جرګې د پای ته رسېدو له امله د دې جرګې ګډونوالو ته مبارکي ویلې ده.

ناټو تړون هم په کابل کې د جوړې شوې مشورتي لويې جرګې د پرېکړو او غوښتنو ملاتړ کړی دی.

د افغانستان لپاره د ناټو تړون ملکي استازي نیکولاس کې پر خپله ټوېټرپاڼه لیکلي دي چې دې جرګې یو لوی پیغام ورکړ او اوس د سولې وخت دی او طالبان باید د افغانستان د خلکو غوښتنو ته درناوی وکړي.
Nick Kay
✔
@NicholasK111
Conclusions of the Consultative Loya Jirga send a very loud message: now is the time for peace and the Taliban should respect the will of the Afghan people. I pay tribute to the #ANDSF who ensured security for this landmark event.

Nick Kay
✔
@NicholasK111
Pleased to represent #NATO at opening of Consultative Loya Jirga on peace in Kabul. Ustad Sayyaf appointed as Chair. Good luck to 3200 delegates. Look forward to their conclusions.

View image on TwitterView image on TwitterView image on Twitter
104
9:47 PM – May 3, 2019 · Afghanistan
Twitter Ads info and privacy
32 people are talking about this
د ناټو ملکي استازي نیکولاس کې په خپل ټوېټ کې د مشورتي لویې جرګې د ښه امنیت نیولو په خاطر د افغان امنیتي ځواکونو ستاینه هم کړې ده.

د سولې مشورتي لويه جرګه پرون د سمدستي اوربند، بین الافغاني خبرو اترو د پیل، د زندانیانو د تبادلې، د افغان امنیتي ځواکونو د حفظ او په همغږۍ او غور سره له افغانستان څخه د بهرینو ځواکونو د وتلو د غوښتنو په شمول له ۲۳ مادو جوړ پرېکړه لیک په خپرولو سره پای ته ورسېده.

وسله والو طالبانو پرون په یوې اعلامیه کې د سولې مشورتي جرګه یوه فرمایشي ناسته وبلله او د اوربند او له افغان حکومت سره يې د مخامخ خبرو په ګډون د دې جرګې غوښتنې رد کړي.

د طالبانو په اعلامیه کې ویل شوي چې تر څو پورې چې بهرني ځواکونه په افغانستان کې وي، د دوی وسله وال فعالیت به دوام ولري.

د طالبانو د قطر د دفتر یوه مسؤل سهیل شاهین ازادي راډیو ته وویل چې اکثره افغانان سوله غواړي، خو د هغه په وینا، د بهرنیو ځواکونو موجودیت د جګړې د دوام سبب دی.