متېس: د افغانستان روانې جګړې راتلونکو اقداماتو په اړه غور کېږي
دآزادی راډیو
د امریکا د متحده ایالاتو دفاع وزیر وايي، په افغانستان کې د روانې جګړې د راتلونکو اقداماتو په اړه غور کوي.
د دفاع وزیر جېمز متېس وايي، د افغانستان د جګړې د راتلونکو ګامونو په اړهيې له ولسمشر اشرف غني او په افغانستان کې د ناټو ځواکونو له عمومي قوماندان جان نېکلسن سره تفصیلي خبرې کړې دي.
ښاغلي متېس چې پرون په ابوظبي کې دا څرګندونې کولې وویل، له ولسمشر اشرف غني سرهيې د مونشن غونډې تر څنګ وکتل او له جنرال نېکلسن سرهيې څو ساعته د وېډیو کنفرانس له لارې خبرې وکړې.
د متحده ایالاتو د دفاع وزیر وايي، پلانيې درلود چې پرون کابل ته سفر وکړي خو د هوا خرابوالی د هغه د سفر مانع شو.
له روېټرز خبري اژانس سره خبرو کې جېمز متېس وویل، د امریکا ولسمشر ډونالد ټرمپ د افغانستان په اړه د ده او د استخباراتي ادارو ارزونو ته منتظر دی خو د نوموړي په خبره لومړی باید دی معلومه کړي چې د افغانستان جګړه په کوم حالت کې ده.
د متحده ایالاتو دفاع وزیر د افغان ځواکونو ستاینه وکړه خو ويېویل چې دې ځواکونو د دې لپاره چې طالبان پر شا وتمبوي په زیاتو تلفاتو سره لویه بیه پرې کړې ده.
د ښاغلي متېس په وینا طالبان دا مهال په تر ټولو کمزوره او خراب حالت کې دي.
په افغانستان کې د نړیوالو ځواکونو عمومي قوماندان جنرال جان نېکلسن په دې وروستیو کې ویلي چې له افغان ځواکونو څخه د پوره دفاع او ملاتړ او د ترورېزم پر ضد د جګړې لپاره څو زرو نورو سرتېرو ته اړتیا لري.
خو د امریکا د دفاع وزیر په پرونیو څرګندونو کې دا ونهویل چې ایا دی به افغانستان ته د نورو ځواکونو د استولو ملاتړ وکړي او که نه؟
دغهراز د روېټرز خبري اژانس په وینا د متحده ایالاتو ولسمشر ډونالد ټرمپ هم په دې اړه چې ایا افغانستان ته به د نورو امریکايي سرتېرو استول منظور کړي او که څنګه؟ ډېر کم وضاحت ورکړی دی.
متحده ایالات دا مهال افغانستان کې شااوخوا ۸۴۰۰ سرتېري لري چې ډېری يې د افغان ځواکونو د روزنې چارې او یو شمېر يې له ترورېزم سره مبارزه پر مخ وړي.
راسره ملګري شئ
اړيکه
زموږ سره اړیکې
معلومات
زموږ په اړه
نظرات بسته شده است.