د پاتې ۳۲۰ طالب بندیانو ازادولو په اړه د افغان حکومت نوی شرط
دامریکا غږ
د افغانستان د ملي امنیت شورا وايي، وسله وال طالبان باید د خپلو پاتې ۳۲۰ بندیانو خلاصولو لپاره د افغان حکومت کمانډو سرتیري ازاد کړي.
د ملي امنیت شورا ویاند جاوید فیصل شنبې په ورځ اګست۲۹مه(وږې۸مه) پر خپل ټوېټر لیکلي چې د افغان حکومت په پلان کې هیڅ تغیر نه دی راغلی.
ښاغلي فیصل زیاته کړې مخکې له دې چې د افغان حکومت لخوا ۳۲۰ طالب بندیان ازاد شي طالبان باید بندي افغان کمانډویان ازاد کړي.
هغه زیاته کړې:”په پلان کې هیڅ تغیر نه دی راغلی،طالبان باید زموږ کمانډویان ازاد کړي، مخکې له دې چې افغان حکومت د طالبانو ۳۲۰ بندیان ازاد کړي،دا اوس په طالبانو پوري اړه لري چې اقدام وکړي چې ترڅو د سولې له بهیر سره مرسته وکړي او د تمې نتیجه تر لاسه شي.”
ښاغلي فیصل نه دي ویلي چې په څومره شمېر افغان کمانډو له وسله والو طالبانو سره بندیان دي.
د ملي امنیت شورا پر داسې مهال د پاتې ۳۲۰ طالب بندیانو د ازادولو په وړاندې دغه نوی شرط رامخته کوي چې د افغان حکومت لخوا د سولې مشورتي لویې جرګې د یادو بندیانو د ازادولو پرېکړه وکړه.
۴۰۰ طالب بندیان چې د افغان حکومت په وینا په حق البعدي مسائلو تورن دي، ولسمشر غني د مشورتي لویې جرګې تر پرېکړې وروسته د هغوی د ازادولو فرمان لاسلیک کړ.
د ولسمشر غني د فرمان تر لاسلیک وروسته افغان حکومت د یادو ۴۰۰ طالب بندیانو له ډلې د ۸۰ تنو د ازادولو خبر ورکړ.
خو د افغانستان د بهرنیو چارو وزارت سرپرست تیره اونۍ د امریکا د سولې انستیتوت په یوې انلاین غونډه کې د وینا پر مهال ویلي چې تر راتلونکې اوونۍ پورې به پاتې طالب بندیان هم آزاد شي او د هغه په وینا له دې کسانو سره به په مجموع کې د آزادو شویو طالب بندیانو شمیر ۵۶۰۰ کسانو ته ورسیږي.
طالبانو تر دا مهاله په دې اړه تبصره نه ده کړې.
نظرات بسته شده است.