د ناټو او روسیې استازي نن پر افغانستان خبرې کوي
تاند- ټاکل شوې ده چې د ناټو – روسیې شورا نن /پنجشنبه/ د سفیرانو په کچه په بروکسیل کې غونډه وکړي.
دا خبره د ناټو د پوځي کمېټې ريیس چک جنرال پیتر پاول د چهارشنبې په ورځ وکړه.
جنرال پاوول په واشنګټن کې خبریالانو ته وویل، دا غونډه د ناټو او روسیې د عادي غونډو په لړ کې کېږي خو دا ځل یې د غونډې په موضوعاتو کې د اوکراین حالات، د پوځي فعالیتونو شفافیت او د افغانستان شخړه هم شامله ده.
تېره اوونۍ سي آی اې روسیه په افغانستان کې د طالبانو په ملاتړ تورنه کړه او د پاکستان د بهرنیو چارو وزیر خواجه اصف هم پرون ومنله چې اوس د پاکستان ترڅنګ روسیه، ترکیه او چین د طالبانو ملاتړ کوي.
د بریتانیا ټایمز ورځپاڼې په وروستیو کې له طالبانو سره د روسیې د مرستې، چې د تېلو په بڼه یې ورکوي، افشا کړې.
ورځپاڼې وویل، طالبانو له روسیې څخه وړیا اخیستي تېل په کابل کې پر یو شمېر سوداګرو پلورلي او پیسې یې د حوالې له لارې ترلاسه کړي دي.
د ټایمز په راپور کې دا نه دي ویل شوي چې طالبانو ته تېل د افغانستان په کومه سیمه کې څرنګه سپارل شوي دي.
نظرات بسته شده است.