د انتخاباتو کمېسیون: نن به د کاندیدانو اسناد په علني جلسه کې تصویب شي
دآزادی راډیو
د افغانستان د انتخاباتو خپلواک کمېسیون رئیس وايي چې نن به د کاندیدانو د نوملېکنې راټول شوي اسناد د دغه کمېسیون په یوه علني جلسه کې تصویب شي.
د انتخاباتو خپلواک کمېسیون رئیس ګلاجان عبدالبدیع صیاد وايي چې د ولسي جرګې او ولسوالیو شوراګانو لپاره د ټولو کاندیدانو اسناد مرکز ته را رسېدلي او د کمېسیون د تخنیکي همکارانو له لوري څېړل شوي.
ښاغلي صیاد د پنجشنبې په ورځ ازادي راډیو ته وویل، دغه اسناد به د ناظرو بنسټونو، مدني ټولنو او خبریالانو په وړاندې د کمېسیون په یوه علني جلسه کې تصویب او بیا به د کاندیدانو لومړنۍ لېست خپور شي.
دی وايي:
“د کمېسیون له تصویبه وروسته د هغو کسانو نومونو اعلانېږي چې زموږ لومړني لېست ته لاره پیدا کوي، هغه کسان چې لومړني لېست ته یې لاره نهوي موندلې، کولای شي د شکایتونو کمېسیون ته د قانون مطابق شکایت وکړي، هغه شکایتونه چې مؤجه وي، د شکایاتو کمېسیون به یې د انتخاباتو خپلواک کمېسیون سره شریک کړي او له هغې وروسته به زموږ وروستۍ نوملړ اعلانېږي.”
د ولسي جرګې او ولسوالیو شوراګانو انتخاباتو ته د کاندیدانو نوملېکنه د جوزا د میاشتې په ۵ مه پيل او د همدې میاشتې په ۲۲مه پای ته ورسېدله.
د انتخاباتو خپلواک کمېسيون د معلوماتو له مخې څه باندې شپږ زره تنو د ولسي جرګې او ولسوالیو شوراګانو څوکیو ته فورمې ډکې کړي دي.
په یادو کسانو کې ۲۴۵۴ یې د ولسي جرګې او۳۷۳۱ یې د ولسوالیو شوراګانو لپاره احتمالي کاندیدان دي.
د انتخاباتو د خپلواک کمېسیون د انتخاباتي مهالویش سره سم ټاکل شوې وه چې د سرطان په اوومه د کاندیدانو لومړنی لېست اعلان کړي.
وبه لیدل شي چې د انتخاباتو خپلواک کمېسیون په لومړني لېست کې څومره کاندیدان د میزان د ۲۸مې انتخاباتو ته لاره پیدا کوي.
د انتخاباتو خپلواک کمېسیون پخوانۍ کمېشنره شریفه زرمتۍ وردګ په علني غونډو کې د اسنادو څېړل د شفافیت لپاره مهم بولي.
نوموړې وايي:
“په علني غونډو کې د اسنادو څېړل د کار د ښهوالي او شفافیت لپاره اړینه او ښه پروسه ده، د قانون له مخې کمېسیون دا صلاحیت لري چې د کمېسیون دارلانشاه کار کوونکي او کمېشنران په خپلمنځي غونډو کې د کاندیدانو اسناد وڅېړي.”
په ورته وخت کې د انتخاباتو د څار یو شمېر بنسټونه ټینګار کوي چې د ولسي جرګې او ولسوالیو شوراګانو انتخاباتو ته د کاندیدانو اسناد په دقیقه ټوګه وڅېړل شي.
د افغانستان د کورنیو چارو وزارت پخواني امنیتي مرستیال مراد علي مراد چې تازه د کابل د ګارنیزیون عمومي قوماندان ټاکل شوی وايي چې د ۳۴ ولایتونو ۳۴۰ ولسوالیو ته انتخاباتي تخنیکي او لوژیستکي مواد رسېدلي دي.
د یادونې وړ ده چې امنیت د روان لمریزکال د میزان د ۲۸مي نېټې د انتخاباتو په وړاندې تر ټولو ستره ننګونه ده، خو افغان چارواکي د انتخاباتو مرکزونو د امنیت ډاډ ورکوي.
نظرات بسته شده است.