د افغانستان دفاع وزارت افغان ځواکونو سره د امریکا همکاري مهمې بولي
دآزادی راډیو
پهداسې حال کې چې د امریکا د ولسمشر ډونالد ټرمپ اداره د افغانستان لپاره د خپل نوې ستراتیژۍ پر بشپړېدو کار کوي، د افغانستان دفاع وزارت له افغان ځواکونو سره د امریکا متحده ایالاتو همکارۍ مهمې بولي.
د افغانستان د دفاع وزارت مرستیال ویاند جنرال محمد رادمنش ازادي راډیو ته وویل:
”هغه ستراتیژي چې د امریکا متحده ایالات یې اعلانوي، په هغوی پورې اړه لري، خو هغه څه چې په دفاع وزارت پورې اړه لري دا دي چې زموږ سره مرسته کوي څو د افغانستان پوځ پر خپلو پښو ودرېږي. لکه چې د امریکا متحده ایالاتو مرستیال ولسمشر وویل چې له افغانستان سره خپلو مرستو ته دوام ورکوي.”
د امریکا مرستیال ولسمشر مایک پنس او د افغانستان ولسمشر محمد اشرف غني د جمعې په ماښام د ویډیو کنفرانس له لارې پر بېلابېلو مسایلو لکه د افغانستان څلور کلن امنیتي پلان، له ترورېزم سره مبارزه او د سیمې پر امنیت خبرې وکړې.
د جمهوري ریاست لهخوا په اعلامیه کې بیا په دې اړه څه نهدي ویل شوي چې ایا دغو دوو مشرانو د افغانستان لپاره د امریکا پر نوي ستراتیژۍ او د هغې د اعلان د نېټې په اړه خبرې کړي دي که څنګه.
د امریکا ولسمشر ډونالډ ټرمپ د جون په میاشت کې د خپلې ادارې دفاع وزیر جېمز متېس ته صلاحیت ورکړ چې په افغانستان کې د امریکایي سرتېرو شمېر وټاکي.
متېس هم ویلي و چې د جولای میاشتې تر نیمایي پورې به پهدې اړه خپل وړاندیزونه ولسمشر ټرمپ ته وړاندې کړي.
پوښتنه دا ده چې د امریکا د نوي ستراتیژۍ اعلان چې د راپورونه له مخې افغانستان ته د شاوخوا څلور زره اضافي امریکایي سرتېرو لېږل هم پهکې شامل دي، ولې دومره ځنډنی شو؟
په واشنګټن کې د سیاسي چارو کارپوه عمر صمد له ازادي راډیو سره په خبرو کې وویل چې د ده په باور څو مورده دي چې د واشنګټن پر دې پریکړې یې اغېز کړی.
دی وايي:
“یو خو په لوړه سطح کې په ځانګړي ډول په سپینه ماڼۍ کې په څو نورو موضوعاتو د چارواکو بوختیا ده چې د افغانستان له موضوع سره ارتباط نهلري. بل د امریکا په تصمیم نیونکي دستګاه کې دننه ځینې کړکېچونه شته. فکري تضادونه ډېری د مرستو پر څرنګوالي دي.”
ښاغلي صمد زیاته کړه، ښه خبر دا دی چې د افغانستان لپاره د مرستې د بندولو هېڅ خبر نهدی اورېدل شوی.
د افغانستان لپاره د امریکا د نوي ستراتیژۍ تر اعلان دمخه د افغانستان بېلابېلې سیمې لکه پکتیا، فاریاب، کندز او غور په دې وروستیو کې د افغان امنیتي ځواکونو او وسلهوالو طالبانو ترمنځ د جګړو شاهدي دي.
د جولای په لومړۍ اوونۍ کې د امریکایي سناتورانو پلاوي چې د سنا مجلس د پوځي خدماتو د کمېټې مشر جان مککېن یې مشري کوله، کابل ته د خپل سفر پرمهال ویلي و چې د امریکا دغه نوې ستراتیژي باید د طالبانو په وړاندې د جګړې لاره بدله کړي او د امریکا متحده ایالاتو تر ټولو اوږده جګړه پای ته ورسوي.
نظرات بسته شده است.