جنرال باجوه له افغان چارواکو سره سولې ته د طالبانو پر حاضرولو ږغېږي
تاند- د پاکستان پوځ وايي، لوی درستیز یې ژر افغانستان ته ځي چې د افغانستان د حکومت او وسله والو طالبانو ترمنځ د سولې د خبرو په اړه له افغان چارواکو سره سلامشوره وکړي.
ویل شوي چې جنرال جاوید باجوه به د افغانستان د حکومت له جګپوړو چارواکو سره د سولې خبرو ته د طالبانو د حاضرولو ترڅنګ د افغانستان او جنوبي اسیا لپاره د امریکا پر نوې ستراتیژۍ وږغېږي.
د امریکا نوې ستراتیژۍ، چې د اګست په وروستیو کې د متحدو ایالتونو ولسمشر ډانلډ ټرمپ اعلان کړه، پاکستان سخت اندېښمن کړی دی. د دې ستراتیژۍ پر اساس د پاکستان په خاوره کې د سختدریځو پناهځایونه د نه زغملو وړ بلل شوي او پاکستان ته د امریکا مرستې محدودې شوي دي.
د پاکستان د حکومت سرچینو تایید کړه چې جنرال باجوه به مسکو ته تر روانېدو مخکې په کابل کې د لنډ وخت لپاره ایسار شي.
دا به د امریکا د نوې ستراتیژۍ له اعلانېدو وروسته افغانستان ته د پاکستان د یوه جګپوړي چارواکي لومړنی سفر وي.
پاکستان پخوا ویلي و چې طالبان د سولې خبرو ته حاضرولی شي او که حاضر نه شول له خپلې خاورې به یې وباسي خو اوس وايي چې د افغانستان لپاره په خپله خاوره کې له طالبانو سره جنګ نه شي کولی.
څرګنده نه ده چې د امریکا نوې ستراتیژۍ او پاکستان ته خبرداري به د اسلام اباد دریځ بدل کړی وي او که به لا هم د پخوا په شان د وخت اخیستلو یا ضایع کولو لټه کوي
نظرات بسته شده است.