افغانستان ته د هند د غنمو درېمه محموله هم راورسېده
تاند، جمعه، د جوزا ۹مه: افغان چارواکي وايي، د هند د غنمو ۷۵ زره ټنه اعلان کړیو مرستو یوه بله محموله هم نن جمعه افغانستان ته راورسېده.
د ملي پراختیا شرکت چې د دغو غنمو د انتقال او ځای په ځای کولو مسوولیت لري، وايي چې په تازه رارسېدلې محموله کې ۵۷۵۰ متریک ټنه غنم راوړل شوي چې د مۍ په ۲۷ مه د چابهار بندر ته او نن جمعه افغانستان ته راورسول شول.
د ملي پراختیا شرکت لخوا تاند ته په استولې خبرپاڼه کې راغلي، هند افغانستان ته د ۷۵زره متریک ټن غنمو د مرستو ژمنه کړې او تر دې دمه ۲۱زره ټنه یې استولي دي: ((تر دې مخکې په دویمه محموله کې ۱۰زره ټنه غنم انتقال او د هرات او کندهار په زیرمو کې ځای په ځای کړل شوي دي.))
دا درېیمه محموله ده چې افغانستان ته انتقالیږي او ټاکل شوې چې د څلورمې محمولې استول به یې بله اوونۍ د جون په اتمه پیل شي.
د یادونې ده چې د کورونا ویروس د پېښو له زیاتېدووروسته نړیوال بانک او ځینو هېوادونو له افغانستان سره په بېلابېلو برخو کې د مرستو ژمنه وکړه.
په دې لړ کې د هند صدراعظم نریندرا مودي ولسمشر غني سره په تیلیفون کې ډاډ ورکړ چې افغانستان ته به غنم ورکوي.
افغان حکومت د کروناویروس د خپرېدو د مخنیوي لپاره په ډېرو ولایتونو کې قرنطین اعلان کړی چې له کبله یې ډېر خلک بېکاره او بې روزګار شوي، په ځانګړي ډول هغه خلک چې د ورځې په مزدورۍ به یې ژوند کاوه.
د کوروناویروس له کبله تر دې دمه په ټول افغانستان کې ۲۶۴ کسان مړه شوي او نژدې ۱۳۶۶۰ کسان په دغه ویروس اخته شوي دي.
نظرات بسته شده است.