ارګ: ګاونډیانو ته د دوی پر ضد د افغان خاورې د نه کارېدو ډاډ ورکوو

تاند، جمعه، د جدي ۱۳مه: ولسمشرۍ ماڼۍ د ایراني جنرال قاسم سلیماني له وژل کیدو وروسته په ځنډ غبرګون ښودلی او ویلي یې دي په عراق او سیمه کې د وروستیو پیښو له کبله د تاوتریخوالي د زیاتیدو په اړه اندیښنه لري.

ولسمشرۍ ماڼۍ په ایران او امریکا د تاوتریخوالي مخنیوي لپاره غږ کړی او هیله یې ښودلې چې دواړه خواوې خپل مسایل د خبرو اترو له لارې حل کړي.

ارګ همداراز ټولو ګاونډیانو ته ډاډ ورکوي چې د متحده ایالاتو سره د امنیتي تړون د احکامو سره سم به د افغانستان خاوره د هیڅ بهرني هیواد په وړاندې ونه کارول شي.

ارګ زیاتوي ولسمشر غني نن د متحده ایالاتو د بهرنیو چارو له وزیر وزیر سره په خبرو کې ټینګار وکړ چې د افغانستان خاوره د دریم هیواد یا نورو سیمه ییزو شخړو پروړاندې ونه کارول شي.

ولسمشر غني ویلي، کابل په سیمه کې پرمختګونه له نږدې تعقیبوي او د سیمې او نړۍ له ټولو هیوادونو سره د دوه اړخیزو او څو اړخیزو اړیکو ټینګښت او پراختیا ته ژمن دی.