غني: د سولې پروسه کې به د خبریالانو اساسي حقوق خوندي وي
صدای المان
تاند ( چهارشنبه، د حوت ۲۷) افغان ولسمشر محمد اشرف غني خبریالانو ته ډاډ ورکړ، چې د سولې پروسه کې به یې له حقوقو کلکه دفاع کوي.
ولسمشر د خبریال ملي ورځې په تړاو پیغام کې ویلي، چې تر هېڅ ډول شرایطو لاندې به د سولې پروسه کې د خبریالانو اساسي حقونه زیانمن نه شي.
ولسمشر په پیغام کې همدا راز د بیان له آزادۍ څخه ملاتړ او معلوماتو ته د لاسرسي پر حق ټینګار کړی دی.
افغان ولسمشر داسې مهال خبریالانو ته ډاډ ورکوي، چې ټاکل شوې د روانې مارچ میاشتې په ۱۸ مه نېټه په مسکو کې د افغان سولې په تړاو کنفرانس ترسره شي.
دې ناسته کې د ګډون لپاره د ملي مصالحې عالي شورا رییس عبدالله عبدالله د یو لوړپوړي پلاوي په مشرۍ د ګډون لپاره روسیې ته روان شوی دی.
د یادې شورا په خبره، په دې یو ورځني کنفرانس کې د افغان دولت رهبران او استازي او د طالبانو د تحریک استازي ګډون کوي، چې د سولې خبرو اترو په چټکېدو، د دوحې مذاکراتو پر پیاوړتیا، د تاوتریخوالي پر کمېدو، د یو خپلواک، په خپل ځان بسیا او له تروریزم څخه پر پاک افغانستان به پکې بحث او خبرې اترې وشي.
بل لورته بیا د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په کابل کې خپل دوه ورځنی سفر پای ته رسولی دی.
نوموړي په ټوېټ پیغامونو کې ویلي چې د افغان سولې د وروستیو پرېکړو په تړاو یې د افغان سیاسیونو او مدني فعالینو ډاډ تر لاسه کړی دی.
خلیلزاد وایي ټول اړخونه د سولې له هغه بهیر ملاتړ کوي چې تېرې لاس ته راوړنې وساتي، جګړه پای ته ورسوي او په پایله کې یې دایمي اوربند رامنځ ته شي.
د امریکا سفارت بیا په یوه خپره کړې اعلامیه کې وایي چې د افغان سولې په تړاو به له نړیوالو شریکانو سره د امریکا غونډې او کنفرانسونه دوام کوي او پوره هڅه کېږي چې په افغانستان کې روانه جګړه پای ته ورسول شي.
نظرات بسته شده است.