د هلمند ۶ پرلت کوونکي په روغتون کې بستر شول

تاند- د هلمند د پرلت لږترلږه ۶ لوږتړ کوونکي وروسته له دې روغتون ته ولېږل شول چې روغتیايي وضعیت یې خراب شو.

راپورونه وايي چې د دوی په منځ کې د دوو حال ښه نه دی.

پرلت والو، چې په خپل ولایت کې د بمي او انتحاري حملو د پای ته رسېدو او اوربند غوښتنه کوي، دوه ورځې وړاندې لوږ تړ وکړ، ویې ویل تر هغو چې ښکېلو خواوو د دوی غوښتنې منلې نه وي، د نه خوړولو اعتصاب ته دوام ورکوي.

د هلمند مرستیال والي پرلت کوونکو ته ویلي چې د اوربند غوښتنه مني خو وسله والو طالبانو ویلي چې پرلت وال دې د دوی سیمې ته د سولې او اوربند لپاره په ننواتي نه ورځي او د دې پر ځای دې په ښوراب او کندهار کې د امریکايي پوځیانو اډو ته ورشي او له هغوی دې وغواړي چې له افغانستانه ووځي.

خو د کوټې شورا په یوه اعلامیه کې پرلت والو ته خبرداری ورکړی چې د طالبانو تر کنټرول لاندې موسي کلا ته ورنه شي او که ورغلل د هرې ناوړه پېښې مسوولیت به د دوی په خپله غاړه وي.

پرلت والو مخکې ویلي وو چې له لشکرګاه څخه به تر موسي کلا پورې پلی لاریون وکړي او له طالبانو به وغواړي چې اوربند ومني.