(د ښاغلي عبدالباري جهاني ښکلی غزل ) کتاب: شپیلۍ

 

 

خدایه د سترګو د ویالو می په ګریوان کي شپه ده

د فریادونو مي د اوښکو په توپان کي شپه ده

 

د خیال همای ته مي لا ولي جوروې تورونه

زما د پرواز د قلندر په لامکان کي شپه ده

 

نن مي د عقل زولنې تر نظر مه تیروه

زما د جنون د افسانې په نیستان کي شپه ده

 

محتسب شمع د شهباز په ګناه ونیوله

چي د رندانو د محفل په شبستان کي شپه ده

 

له کوم پرهاره مي پوښتې د زمانې طبیبه

زما د نصیب یې د هر غشي په نښان کي شپه ده

 

لکه شبنم در څخه الوزم سبا به نه یم

نن مي د عمر د قسمت په ګلستان کي شپه ده

 

نه مي نسیم نه مي سبا پر ژبه زیری لري

د هر ګل بوټي هر ګلاب مي په خزان کي شپه ده

 

د جهاني قلم ته نه ځي د مستۍ سندري

د هر غزل یې د زخمونو په دېوان کي شپه ده

 
خواندن 906 دفعه

شما همچنین ممکن است مانند بیشتر از نویسنده

نظرات بسته شده است.