پاکستان د افغان مخابراتي سيستم د انحصار او کنټرول هڅې پیل کړي

تاند: ( دوشنبه ، د دلوې یوولسمه) کابل ته د پاکستان د ملي امنيت سلاکار ډاکټر معيد يوسف له سفر او د افغانستان د مخابراتو د تنطيم ادارې ( اترا) څخه تر لیدنې وروسته یې پاکستان تورن شوی، چې د افغانستان د مخابراتي خدمتونو د انحصاري کولو او کنټرول په هڅه کې دی.

د اترا ادارې مسوولینو تایید کړې، چې معید یوسف او ورسره ملګري پلاوي یې د طالبانو د مخابراتو وزارت او اترا سرپرست مولوي نجیب الله حقاني او نورو چارواکو سره لیدلي.

اترا ادارې په یوه اعلامیه کې ویلي: مولوي حقاني پاکستاني پلاوي ته د ځینو ستونزو لکه؛ د تاجکستان، ازبکستان او ترکمنستان په پرتله له پاکستان څخه د انټرنېټ په لوړه بیه اخیستلو، له پاکستان سره د مرین او دارک نوري فایبر کیبل د نښلونې او پرمختیا، د اقتصادي زیان څخه د مخنیوي په پار د دواړو هېوادونو ترمنځ په صفري نقطه کې د فریکونسیو اذیت او تداخل څخه د مخنیوي، له منځنۍ آسیا، سیمې او نړۍ سره د ترانزیت لپاره د افغانستان له خاورې د ګټه اخیستنې او په افغانستان کې د عصري مخابراتي او معلوماتي ټکنالوجۍ (آی ټي ) آسانتیاوو رامنځته کولو او د مخابراتو او انټرنېټ په برخه کې یې ددغه هیواد اړتیاوې له پاکستاني پلاوي سره شریکې کړې.

حقاني زیاته کړې:(( دغه اداره په هېواد کې مخابراتي خدمتونو کنترول پر غاړه لري که د پاکستان اسلامي جمهوریت په دې برخه کې خپلې تجربې له یادې ادارې سره شریکې کړي ګټورې به تمامې شي.))

سرچينه زياتوي: حقاني په بیلابیلو برخو، په ځانګړي ډول د مخابراتو او معلوماتي ټکنالوژۍ په برخه کې د ګاونډیو هېوادونو رول ګټور وبللو او د پاکستان هېواد له امنیتي مشاور څخه یې وغوښتل، چې د زیربناوو په برخه کې له دغه هېواد سره مرسته او همکاري وکړي.

د اترا د اعلامیې په اساس، د پاکستان د ملي امنیت مشاور معید یوسف د مخابراتو وزارت او اترا ادارې سرپرست خبرې واورېدې او زیاته یې کړه، چې دوی د افغانستان سره په مختلفو برخو کې همکاریو ته چمتو دي.

معيد یوسف زیاته کړې، چې پر افغانستان د انټرنیټ خرڅلاو د بیو په اړه به بیاځلي کتنه وشي، او د ځینو نورو کړنو په هکله یې په آنلاین بڼه د ځیني پروګرامونه او سافټویرونو وړاندیز وکړ، چې د مخابراتو وزیر له لوري د ګټور تمامیدو په صورت کې له هغې څخه د ګټه اخیستنې سپارښتنه وشوه.

د اترا اعلامیه زیاتوي، چې په مخابراتي سکتورکې د دوه اخیزو همکاریو د لاپراختیا او یو له بل سره د تجربو شریکولو په برخه کې د ګډې کمیټې جوړولو په هکله هم خبرې وشوې.

یو شمېر افغان منتقدینو بیا ویلي، چې پاکستان د افغانستان د مخابراتي سکتور د انحصاري کولو او کنټرول هڅې پیل کړي، چې دغه سفر یې پيلامه وه.

د افغانستان د مخابراتي سکتور يوې سرچينې تاند ته ويلي، چې پاکستان د طالبانو په وسيله د افغانستان مخابراتي کمپنۍ غواړي په زوره له مالکانو وپیري او په پيسو کې يې په ښکاره يا ځینې پاکستان پلوه پانګوال شریک کړي، يا يې د طالبانو حکومت مالک او اصلي ګټه پاکستان ته يوسي.

افغان مخابراتي کمپنۍ هره مياشت په سلګونه میلیونه ډالره عايد لري.