د یخي پر سر په شخړه کې ۴ تنه ووژل شول

تاند- د وسله والو طالبانو او داعشیانو د انتحار او انفجار ترڅنګ روژه هم لږترلږه د ۴ افغانانو د وژل کېدو پلمه شوه.

په ننګرهار کې چارواکي وايي چې پرون /یکشنبه/ د یخي پر سر د دوو کورنیو ترمنځ په شخړه کې د یوې ښځې په شمول ۴ تنه ووژل شول.

د ننګرهار د والي ویندوی عطا الله خوږیاڼي رسنیو ته وویل چې دا پېښه په چپرهار ولسوالي کې وشوه.

ده زیاته کړه، د ملا رقیب او سید ملا جان د کورنیو ترمنځ د چپرهار په للمۍ سیمه کې د یخي پر سر شخړه راغله او پر یو بل یې ډزې وکړې.

د خوږیاڼي په وینا په ډزو د دواړو کورونیو لږترلږه ۴ تنه وژل شوي دي.

په وژل شویو کې ۳ تنه د ملا رقیب د کورنۍ دي او یوه ښځه د سید ملا جان د کورنۍ ده.

په روژه کې ډېر ځلي د یخي پر سر په تودو ولایتونو کې جنجالونه کېږي. د تېر کلونو په پرتله سږ کال روژه په داسي وخت کې برابره شوې چې هوا زیاته توده ده.

د ننګرهار د والي ویندوی وايي چې د شخړې اصلي عاملان تښتېدلي خو د هغو د نیولو لپاره هلې ځلې روانې دي.