د اسیا زړه کنفرانس: هند دې د افغانستان تعلیمي او چین زېربنايي سیکتورونه په غاړه واخلي

 

 

 

تاند- د هند په امرتسر کې د سیمې د ۱۴ هیوادونو د جګپوړو چارواکو په ګډون د اسیا زړه کنفرانس په درشل کې له هند څخه وغوښتل شول چې په افغانستان کې د تعلیم په برخه کې مخکښ رول په غاړه واخلي.

 

د چین او پاکستان په شمول په اسیا زړه کنفرانس کې د ۱۴ ګډون کوونکو هیوادونو جګپوړو چارواکو وړاندیز وکړ چې چین دې د سیمې د زېربنا په انکشاف کې مسوولیت په غاړه واخلي او هند دې د افغانستان تعلیمي سیکتور ته وده ورکړي.

 

دوی دغه راز وړاندیز وکړ چې ایران دې د افغانستان د سوداګرۍ، اقتصاد او د پانګونې د فرصتونو د رامنځته کولو په برخه کې مخکښ رول ومني.

 

د انډیا ایکسپریس ورځپاڼې د راپور له مخې، د اسیا زړه کنفرانس د فرعي کمېټې له لوري دا وړاندیزونه په داسي حال کې وشول چې یوه جګپوړي افغان دیپلومات وویل، افغانستان په سیمه کې د امنیتي ستونزو په وړاندې د یوې ښې تعریف شوې تروریستی ضد ستراتیژۍ وړاندیز کوي.

 

د دې ستراتیژۍ مسوده له هند سره شریکه شوې ده.

 

هند به راتلونکې اوونۍ له افغانستان سره په ګډه د اسیا زړه د شپږمې غونډې کوربه وي.

 

یوه چارواکي وویل «موږ هیله لرو چې دا ستراتیژي به په امرتسر کې د اسیا زړه په راروان کنفرانس کې تصویب شي. د دې ستراتیژۍ د تصویب په صورت کې به غړي هیوادونه مکلف شي چې تروریستانو ته پناه ورنه کړي.»

 

په وروستیو کې په نوي دیلي کې د افغانستان سفیر شیدا محمد ابدالي وویل چې د اسیا زړه کنفرانس غړیو حکومتونو موافقه کړې چې د افغانستان په کورنیو چارو کې پر نه لاسوهنې د عمل لپاره پکار ده چې له تروریستانو سره مبارزه وشي، د ترهګرو پناهځایونه ویجاړ کړل شي او دا ومنل شي چې تروریزم نړیوالې سولې او امنیت ته ګواښ دی.

 

د اندیا ایکسپریس ورځپاڼې پر اساس، هندي چارواکي وايي، نوی ډیلی لېوال دی چې دا ټول وړاندیزونه تصویب شي.

شما همچنین ممکن است مانند بیشتر از نویسنده

نظرات بسته شده است.