چین په کابل کې د نیله باغ پروژې د لومړۍ برخې جوړولو کارونه پیلوي

تاند (سه شنبه د میزان ۱) چین په افغانستان کې د نیله باغ پروژې د ۱۴۰۰ اپارتمانونو جوړولو کار پیلوي.

له ارګ څخه په خپره شوې خبرپاڼه کې ویل شوي، نن د ولسمشر غني او په افغانستان کې د چین د سفیر په حضور کې د کابل ښار د دارالامان په نیله باغ سیمه کې د استوګنې ۱۴۰۰ اپارتمانونو جوړولو پروژې د لومړي فاز کار پیلولو تړون لاسلیک شو.

دغه تړون د افغانستان د ښارجوړولو او ځمکو وزارت او د چین هیواد MCC19 شرکت ترمنځ لاسلیک شوی دی.

د ارګ خبرپاڼه کې ویل شوي، دا تړون نن سه شنبه په چهار چینار ماڼۍ کې د ښارجوړولو او ځمکو وزارت د سرپرست او د چین هیواد MCC19 شرکت مدیر له لوري لاسلیک شوی دی.

د خبرپاڼې د معلوماتو له مخې د دغه ښارګوټي د جوړېدو هوکړه لیک په ۲۰۱۵ کال کې د افغانستان د حکومت او د چین جمهوریت ترمنځ لاسلیک شوی و چې له مخې یې چین د استوګنې لپاره د ۱۰ زره اپارتمانونو جوړولو ژمنه کړې وه.

د یادونې وړ ده چې اوس له هغې مجموعې څخه په یاده سیمه کې د ۵۶ څلور پوړېزو بلاکونو جوړولو تړون لاسلیک شوی او تمه کېږي چې عملي چارې یې هم دېر ژر پیل شي.

000