د کابل شخصي ښوونځي د سرتېرو یتیمانو ته وړیا داخله ورکوي

تاند، چهار شنبه، د قوس ۶مه: د پوهنې وزارت اعلان کړی چې د کابل خصوصي ښوونځیو او کورسونو ورسره ژمنه کړې چې د ملي امنیتي- دفاعي ځواکونو په لیکو کې د قرباني سرتېرو ماشومانو او د سړک د غاړې ماشومانو ته وړیا ښوونیز خدمات وړاندې کوي.

د یاد وزارت لخوا تاند ته په استولې خبرپاڼه کې راغلي د وزارت په هڅو به د شهیدانو سرتېرو ماشومانو او د سړک د غاړې ماشومانو ته په ټول کابل کې وړیا زده کړه ییزې اسانتیاوې برابرېږي.

د وزارت ویاندې نوریه نزهت هم په دې اړه تاند ته د هڅو تایید وکړ او زیاته یې کړه د ۱۳۹۹ کال په اوږدو کې به د سړک د غاړې ماشومانو ته له ۱۰ څخه تر ۵۰ سلنې پورې د کابل په خصوصي ښوونځیو کې د فیس تخفیف ورکول کېږي او د شهیدانو سرتېرو ماشومانو ته به د د تعلیمي دورې تر پایه پورې مفته ښوونیزې اسانتیاوې برابرېږي.

نوموړې وايي، په راتلونکي ۱۳۹۹ کال کې به ۱۴۸۲۷ ماشومان په ټول کابل کې د مفته زده کړو تر پوښښ لاندې ونیول شي: (( په دې جمله کې ۱۰۸۱ ماشومانو ته فیس معاف شوی، ۳۴۳۵ تنو ته ۵۰ سلنه تخفیف ورکړل شوی، ۳۳۵۱ ماشومانو ته ۲۵ سلنه تخفیف او ۶۵۸۳ ماشومانو ته ۱۰ سلنه تخفیف د کابل په ټولو شخصي ښوونځیو کې په پام کې نیول شوی دی.))

د اغلې نزهت په خبله د کال تر پایه به دا پروګرام له شخصي ښوونځیو سره د ټول هېواد په ۳۴ ولایتونو کې هم پلی کړی.

دا په داسې حال کې ده چې دا مهال په ټول افغانستان کې د بې وزلۍ، ناامنۍ او فرهنګي بندیزونو له کبله ۳ میلیونه او ۷۰۰ زره ماشومان له ښوونځي محروم دي.