ارګ: ولسمشر به ډېر ژر د غوراوي کمېټې له لوري د ۳ پېژندل شویو نه یو معرفي کړي

دآزادی راډیو

وروسته له هغې چې د انتخاباتو لپاره د غړو د معرفي کولو د غوراوي کمېټې درې تنه نوماندان معرفي کړل جمهوري ریاست که څه هم دقیقه نېټه نه‎ښايي خو وايي، ولسمشر به ډېر ژر د دې درې کسانو له ډلې یو يې د انتخاباتو د خپلواک کمېسیون د غړي په توګه وټاکي.

د ولسمشر مرستیال ویاند نجیب ازاد د جمعې په ورځ ازادي راډيو ته وویل چې سید حفیظ الله هاشمي، اول الرحمن رودوال او عبدالقادر ځاځي وطن دوست درې هغه نوماندان دي چې د دې کمېټې له لوري د پنجشنبې په ورځ ناوخته ولسمشر ته معرفي شول.
ښاغلي ازاد وویل:

“حکومت به ډېر ژر د خپلې ژمنې له مخې یو کس د افغانستان ملت ته اعلان کړي او جمهور رئیس به له درې واړو معرفي شویو نوماندانو سره مرکې وکړي او له‎منځه به يې یو کس ډېر ژر د انتخاباتو کمېسیون غړیتوب ته معرفي شي.”

دا په داسې حال کې ده چې د انتخاباتو د خپلواک کمېسیون د پخواني رئیس نجیب‎الله احمدزي له لېرې کېدو وروسته د روان لمریزکال د جدي په اوومه ولسمشر محمد اشرف غني د غوراوي کمېټه وټاکله، تر څو د کمېسیون لپاره یو بل غړی ورمعرفي کړي.

هغه کسان چې د غوراوي کمېټې له لوري معرفي شوي باتجربه کسان دي.
راپورونه وايي، یادې کمېټې ته د کار له پیله نېږدې ۸۸ کسانو خپل اسناد سپارلي وو چې د اسنادو له ارزیابي کولو او ازموینو اخېستو وروسته يې ترې درې تنه ولسمشر ته معرفي کړل.

د یادولو وړ ده چې د افغانستان د انتخاباتو خپلواک کمېسیون د ولسي جرګې او ولسوالیو شوراګانو د راتلونکو انتخاباتو لپاره د ۱۳۹۷لمریز کال د سرطان ۱۶مه نېټه اعلان کړې ده.

له بله‎خوا د انتخاباتو لپاره مدني ټولنې شبکه یا اکسین د انتخاباتو د غوراوي کمېتې کار د انتخاباتو د قانون خلاف بللې او ویلي دي، هر کس چې د دې کمېټې له‎خوا معرفي کېږي قانوني مشروعیت نه‎لري او کارونه به يې د انتخاباتو پر خپلواک کمېسیون منفي تاثیرات ولري.
د دې شبکې رئیس جانداد سپین‎غر ازادي راډيو ته وویل:

“د انتخاباتو د قانون له مخې د غوراوي کمېټې کار غیر قانوني دی، موږ دا اندېښنه لرو چې د غوراوي کمېټه چې کوم کس معرفي کوي دا کس هم چې د یوې غیر قانوني پروسې له مخې راځې، نو قانوني مشروعیت به يې ډېر کمزوری وی او دا امکان لري چې د کمېسیون په کارونو ډېر منفي تاثیرات ولري.”
خو افغانستان د مشرانو جرګې یو غړی نثار حارث بیا وايي، هغه کسان چې د غوراوي کمېټې له لوري معرفي شوي باتجربه کسان او مسلکي کسان دي.

ښاغلی حارث وايي، که د دې کسانو په کارونو کې سیاسي، ګوندي او قومي مداخلې ونه‎شي او هغوی دا پروسه په سمه توګه مدیریت کړي نو راتلونکې انتخابات به په شفاف ډول ترسره شي.