ټیلګراف: د طالبانو مشر د قطر د دفتر غړي پاکستان ته وربللي

 

تاند- د بریتانیا ټیلګراف ورځپاڼه وايي، د طالبانو مشر ملا هبة الله اخوندزاده له امریکا سره د خبرواترو د نوي پړاو تر پیلېدو مخکې په قطر کې د خپل دفتر غړي د سلامشورې لپاره پاکستان ته ورغوښتي دي.

د ورځپاڼې د راپور له مخې، د طالبانو د قطر د دفتر ۷ غړي روانه اوونۍ پاکستان ته رسېدلي دي.

ټیلګراف وايي، د امریکا د سولې له ځانګړي استازي زلمي خلیلزاد سره تر کتنې وړاندې به د طالبانو د مشرتابه او د هغوی د قطر د استازو کتنه د ګډ دریځ د غوره کولو لپاره مهمه وي.

د طالبانو مشران په خپل منځ کې وروسته له دې ګوري چې په هلمند کې د دوی یو مهم مشر ملا عبدالمنان، چې ویل کېږي د سولې د خبرو مخالف و، ووژل شو.

د طالبانو د دوحې د دفتر یوه غړي پاکستان ته د دې دفتر د غړیو سفر ته په اشارې ټیلګراف ورځپاڼې ته ویلي«دا مهم سفر دی او د سولې په راتلونکو خبرو کې به طالبانو ته ډېر شیان تعریف شي.»

ده زیاته کړه«موږ به د سولې په خبرو کې د پرمختګ په اړه کلمه په کلمه خپل مشرتابه ته معلومات ورکړو. د دې لپاره چې له خلیلزاد سره د راتلونکې اوونۍ په خبرو کې ښه دریځ ولرو موږ به د ګڼو مسلو په اړه له دوی سره مشوره وکړو.»

دې طالب سرچینې په عین حال کې وویل چې دا لا څرګنده نه ده چې د شېرمحمد عباس ستانکزي په مشرۍ د طالبانو پلاوی به د طالبانو له مشر ملا هبة الله سره مخامخ وویني او که نه.

ویل کېږي چې هبة الله له کله چې د طالبانو مشر ټاکل شوی دی، له خپلو استازو سره په ندرت تماس نیسي.

ټیلګراف ورځپاڼه زیاتوي، یوې لوېدیځې سرچینې پاکستان ته د طالبانو د دوحې د دفتر د پلاوي سفر تایید کړ، ویې ویل چې په دې پلاوي کې ۵ تنه شامل دي.

په همدې حال کې د افغانستان د سولې لپاره د امریکا ځانګړي استازي زلمي خلیلزاد نن له پاکستاني چارواکو سره خبرې پیل کړې.

د طالبانو د قطر د دفتر یوه غړي ټیلګراف ورځپاڼې ته ویلي، له امریکایانو سره د دوی خبرې پر مخ روانې دي خو ډېرې مسلې لا شته چې باید حل شي.

ده وویل، اختلافات ډېر دي حو ښه خبره دا ده چې خبرې کېږي.

شما همچنین ممکن است مانند بیشتر از نویسنده

نظرات بسته شده است.