ولسمشر غني: هغوی چې په وژنو او فتنه بوخت دي، د ابوحنیفه له مکتبه خبر نه دي

دآزادی راډیو

ولسمشر محمد اشرف غني وايي، افراطي ډلې چې د مسلمانانو د تمدني هویت د ختمولو هڅه کوي، د امام ابوحنیفه له مکتب څخه ناخبره دي.

ولسمشر محمد اشرف غني وايي، هغه کسان چې په افغانستان کې په وژنو او فتنه بوخت دي، د امام ابوحنیفه په مکتب پوه نه دي.

ښاغلي غني چې د دوشنبې په ورځ یې د امام اعظم ابوحنیفه څېړنیزې او علمي غونډې ته خبرې کولې، وویل چې دا وخت چې افراطي ډلې د مسلمانانو د تمدني هویت د ختمولو هڅه کوي، په کار ده چې دیني عالمان د ثبات په اهمیت او د امام اعظم د مکتب د لارې عامولو ته جدي کار وکړي.
ښاغ اشرف غني وویل:

“مونږ هره ورځ په دې خاوره کې شهیدان ورکوو، بچیان، خویندې، سپین ږیري او ځوانان مو شهیدان کیږي او دا ځکه چې هغه اشخاص چې په فتنه باندې بوخت دي، د امام ابوحنیفه په مکتب باندې خبر نه دي، کله چې دوی د امام اعظم په فکر باندې پوه شي، دوی بیا فکر ته مجبورېږي، ځکه هغه څه چې دوی يې کوي، په دغه مکتب کې ځای نه لري.”

ښاغلي غني وویل، په حنفي فقه کې انتحار او چاودنې نشته او د کفر او اسلام دار په واضح ډول بیان شوی چې که په اړه یې مطالعه وشي، ډېر خلک به په خپله لار بیا غور وکړي.

له روژې مخکې د افغان عالمانو له خوا د امام ابو حنیفه د ژوندانه او تګ لارو په اړه دا څېړنیز کنفرانس داسې وخت جوړ شوی چې د ښاغلي غني په خبره، افراطیت د افغان مسلمانانو بېلابېلې برخې زیانمنې کړې دي.

د دغې ستونزې د حل لپاره، همدا تېره جمعه په اندونیزیا کې د افغانستان، پاکستان او اندونیزیا عالمان په اندونیزیا کې د د بوګور په ښار کې سره راغونډ شوي وو.

د دغو دیني عالمانو د ناستې په پرېکړه لیک کې په افغانستان کې ځان وژونکې حملې حرامې ګڼل شوي او پکې راغلي چې له سولې سره مخالفت، له الهي احکامو سره مخالفت دی.

د افغانستان د حج او او قافو وزیر فیض محمد عثماني دغې غونډې ته وویل، حنفي فقه یو بشپړ نظام دی چې د مراعت سره یې د ژوندانه ډېرې ستونزې حلېږي.
دی وایي:

“حنفي فقه د اسلامي فقهې یو هغه نادر نظام دی چې د اړیکو، ټولنیزو، حکومتي حقوقو او نړیوالو اړیکو په برخه کې، تشریحي احکام لري.”

نوموړی وايي، په اوسني وخت کې چې د جګړې اور ګرم دی، د امام اعظم د افکارو پېژنده ځانګړی اهمیت لري چې کولای شي، مونږ د خبرو اترو تر سرحده ورسوي.

راپور: یوسف خان ځدراڼ

 

شما همچنین ممکن است مانند بیشتر از نویسنده

نظرات بسته شده است.