سرپل کې د طالبانو د تش په نوم دفاع وزیر پر لویه غونډه برید شوی

 

تاند، یکشنبه، د سرطان ۸مه: په شمالي ولایت سرپل کې نظامي سرچینې وايي، د سوزمه قلعه ولسوالۍ د کټه کلا په کلي کې یې د طالبانو پر یوه لویه غونډه هوایي برید کې د دغې ډلې لوړ پوړې کسان وژلي دي.

په شمال کې د ۲۰۹ شاهین قول اردو پر خپل رسمي فیسبوک لیکلي چې په دې غونډه کې د طالبانو د تش په نوم دفاع وزارت مرستیال ملا مزمل هم ګډون درلود.

د سوزمه قلعه ولسوال صبغت الله پهلوان زاده بیا وایي، چې د برید لاندې راغلی کلی د طالبانو په کنټرول کې و او دغلته د طالبانو د شمالي سیمو د مشرانو لوی مارش او غونډه په نښه شوې ده.

هغه وویل چې له برید وروسته د دې سیمې لار د خلکو او موټرو د تګ راتګ پر مخ تړل شوې او طالبانو سیمې ته په ورتلونکو موټرو برید کړی دی.

ښاغلي پهلوان زاده زیاته کړه چې په سیمه کې د مخابراتو شبکه هم قطع شوې او د طالبانو د تلفاتو شمیر معلوم نه دی نه هم د ملا مزمل د برخلیک په اړه هیڅ معلومات نه لري چې د راپورونو له مخې په دې ناسته کې یې برخه اخیستې وه.

د سرپل د والي ویاند ، ذبیح الله اماني که څه هم د برید پخلی وکړ او زیاته یې کړه ، چې د طالبانو لویه غونډه تیره شپه د کټه کلا په کلي کې جوړه او په نښه شوې خو د تلفاتو د شمیر په اړه یې فقط همدومره وایي، چې طالبانو ته درنه مرګژوبله اوښتې.

طالبانو بیا په دې تړاو څه نه دي ویلي.

شما همچنین ممکن است مانند بیشتر از نویسنده

نظرات بسته شده است.